"Супер сулуу" Бактыгүл Орозбаева менен "тамашоучу" Калыбек Турдубаев Бали аралынан кайтып келишти

Бүгүн, 12-февралда "Супер сулуу" Бактыгүл Орозбаева менен "тамашоучу" Калыбек Турдубаев Бали аралынан кайтып келишти. Бир жума бою жылуу өлкөдө эс алып, жагымдуу сезимдерге чулганган эс алуучулар SUPER.KG порталына ой бөлүштү.

"Абдан жакшы эс алып кайттык. Индонезия өлкөсү мага аябай жакты. Ал жакта күнгө кактанып түрдүү кызыктарга күбө болуп келдик. Эң негизгиси бул өлкөнүн эли аябай меймандос, маданияттуу эл экен. Кооз жерлерди көрүп, сууга чөмүлүп ырахат алдык. Бизге ушундай шарт түзүп берген "Супер-Инфо" гезити менен SUPER.KG порталынын жамаатына терең ыраазычылык билдирем", - деди Калыбек Турдубаев.

Жолдомонун ээлери Индонезиянын Бали аралына жетүү үчүн 18 саат жол жүрүшкөнүн айтышты. Кызын тосуп алуу үчүн атайын Баткен облусунан келген Бактыгүл Орозбаеванын ата-энеси да сүйүнүп турушту.

"Балинин маймылдар байырлаган сейил багына барып, экзотикалык жандыктар менен тааныштык. Мындай көрүнүшкө күбө болуу менен жаратылыш бизге ырахат тартуулады. Океандын жээгинде жүрүп күнгө күйүп калдык. Калкынын маданияты абдан жогору экен. Бизге сый көрсөтүп жатышты. Көчөдө жүрсөк тааныш эмес адамдар эле саламдашып, жылмайып баш ийкешип, меймандостугун көргөзүштү. Жергиликтүү элдин тилине түшүнбөй бир аз кыйналганыбыз болбосо мунун да айласын таап кол менен жаңсоо менен түшүндүрүп жаттык. Жакындарыма Балинин чайын, кофесин жана башка кооз буюмдарын алып келдим", - деген Бактыгүл Орозбаева кубанычын жашырган жок.

"Супер сулуу" Бактыгүл Орозбаева менен "тамашоучу" Калыбек Турдубаевдин Бали аралына болгон сапарындагы кызыктарды "Супер-Инфо" гезитинин жаңы санынан кеңири окуй аласыздар.