АКШ, Япония жана Түштүк Корея Түндүк Кореянын ракета сыноосун айыптоодо

Түндүк Кореянын баллистикалык ракета сыноосуна байланыштуу АКШ, Япония жана Түштүк Корея Бириккен Улуттар Уюмунун Коопсуздук кеңешин чукул жыйынга чогулууну талап кылууда. "Рейтер" агенттигинин билдиришинче, БУУнун Коопсуздук кеңеши бүгүн, 13-февралда жыйын өткөрүшү күтүлүүдө.

Түндүк Корея ракетасын 12-февралда сыноодон өткөрдү. Маалыматтарга таянсак, Pukguksong-2 ракетасы Пхёнан-Пукто провинциясынан учурулуп, 500 чакырымдай учкан аппарат Япон деңизине кулаган. Ракета сыноосуна Түндүк Кореянын президенти Ким Чен Ын катышкан. 2016-жылы Түндүк Корея 20дан ашык баллистикалык ракета учуруп, эки өзөктүк сыноо өткөргөн. Бул БУУнун Коопсуздук кеңешинин резолюциясын бузуу деп бааланып, БУУнун Коопсуздук кеңеши Түндүк Кореяга санкция киргизгени белгилүү.