Өкмөт башчы Тайырбек Сарпашевдин убактылуу кызматтан бошотуу арызын канааттандырды

Өкмөт башчы Сооронбай Жээнбеков Мамлекеттик каттоо кызматынын төрагасы Тайырбек Сарпашевдин жазган арызынын негизинде убактылуу кызматтан бошотуу тууралуу жарлыкка кол койду. Бул тууралуу бүгүн, 13-февралда Өкмөттүн басма сөз кызматынан билдиришти.

Маалыматка караганда, Мамлекеттик каттоо кызматынын төрагасынын милдетин убактылуу аткаруу Күмүшбек Шамкановго жүктөлдү.

Буга чейин Башкы прокуратурага Мамлекеттик каттоо кызматынын төрагасы Тайырбек Сарпашевди кызматтан алуу боюнча сунуш берген. Буга Максим Бакиевдики делген Скрябин көчөсү, 45-45-а дарегинде жайгашкан жердин аресттен чыгып, сатылып кетиши себеп болгон. Бирок Сарпашев эч кандай күнөөсү жок экенин айтып келүүдө. Мындан улам мекемелер аралык комиссия түзүлгөн. Комиссиянын жыйынтыгы бир айдын аралыгында чыгат. Ал эми бүгүн эртең менен Тайырбек Сарпашев убактылуу кызматтан кетип туруу боюнча өкмөт башчыга арыз жазганын билдирген.