Сабалган журналист кылмыш иши ачылгандан кийин кайра тосмо арыз жазды

Бишкекте белгисиз адамдар тарабынан сабалган журналист кылмыш иши ачылгандан кийин кайра тосмо арыз жазды. Маалыматты 14-февралда SUPER.KG порталына Бишкек шаардык ички иштер башкы башкармалыгынын басма сөз кызматы ырастады.

Маалыматка ылайык, жабырлануучу Амантур Мусагулов арыз менен Бишкек шаарынын Ленин райондук ички иштер башкармалыгына кайрылган. Анын негизинде бир катар материалдар чогултулуп, "бейбаштык" беренеси боюнча кылмыш иши козголгон. Бирок кылмыш иши ачылгандан кийин эле Мусагулов милицияга кайрылып, тосмо арыз жазып берген. Ал өзүн сабаган жарандарга эч кандай дооматы жок экенин билдирген.

Буга чейин активист Адил Турдукулов Фейсбуктагы баракчасына "Де-Факто" гезитинин редактору Амантур Мусагуловду 10-февраль күнү саат 21:30 чамасында белгисиз адамдар сабап кетишти" деп билдирүү калтырган.