Өлкөдө эми Европанын автоунаалары лабораториядан өткөрүлүп, анан катталат

Кыргыз жерине ЕАЭБге мүчө эмес өлкөлөрдөн алынып келинген автоунаалардын коопсуздугун күбөлөндүрүүчү лабораториялардын 80 пайызы даяр. Бул тууралуу 14-февралда маалымат жыйынында Экономика министрлигинин Техникалык регламент жана метрология башкармалыгынын жетекчиси Султан Ахматов билдирди.

Кыргыз Республикасына Евразиялык экономикалык биримдикке мүчө эмес өлкөлөрдөн алынып келинген автоунааларды каттоодо кошумча эреже киргизилген. Жаңы эрежеге ылайык, эми Европа өлкөлөрүнөн алынып келинген автоунаалар ЕАЭБдин бирдиктүү реестрине киргизилген сыноо лабораториялары (диагностикалык борборлор) тарабынан берилген документтин негизинде гана каттоодон өткөрүлүп, номур берилет. Өлкөдө азырынча аталган лаборатория жок. Өкмөт аны 1 айдын ичинде ачууну убадалап жатат. Ага чейин унаалар убактылуу каттоодон өткөрүлүп, убактылуу мамлекеттик номурлар берилет.