Ошто үчүнчү көпүрөнүн курулушуна капсула салынды

Бүгүн, 15-февралда Оштогу Сай-Бою жана Тилеке баатыр көчөлөрүн бириктирген көпүрөнүн курулушуна капсула салынды. Ага шаар мэри Айтмамат Кадырбаев, шаардык кеңештин депутаттары, мекеме-ишканалардын жетекчилери жана шаардыктар катышты. Маалыматты мэриянын басма сөз кызматы кабарлады.

Айтмамат Кадырбаев үчүнчү көпүрө Навои жана Түштүк чыгыш кичи районунда салынган эки көпүрөдөн үнөмдөлгөн акча каражатынын эсебинен салынып жаткандыгын билдирди.

“Сай-Бою жана Тилеке баатыр көчөлөрүн бириктирген бул көпүрө үнөмдөлгөн акча каражатынын эсебинде тургузулуп жатат. Узундугу 45 метр болгон көпүрөнүн тендердик баасы 21,2 миллион сомду түздү. Үчүнчү көпүрөнүн курулушу үстүбүздөгү жылдын июль айында аяктайт. Ош шаары үчүн эле эмес, бүткүл кыргыз эли үчүн кызмат кылган, достуктун, ынтымактын көпүрөсү болсун деп тилек кылып капсуласын салдык”, - деди мэр.

Ал эми шаардык жолдор башкармалыгынын башчысы Арзыбек Жунусовдун айтымында, курулуш материалдар, көпүрөнүн сапаты бир нече кызматтар тарабынан тынымсыз көзөмөлгө алынат.

Белгилей кетсек, Сай-Бою жана Тилеке баатыр көчөлөрүн бириктирген үчүнчү көпүрөнүн сметалык баасы 38 миллион сом, ал эми тендердик баасы 21,2 миллион сом. Жалпы узундугу 45 метр, унаа жүрүүчү бөлүк 7 метр, ал эми туурасы 15 метр болот. Курулуш иштери “Сутранспромжилстрой” компаниясы тарабынан жүргүзүлөт.