Депутат Кыргыз өлкөсү ЕАЭБге эмнеге киргенин түшүнбөй жатат

Жогорку Кеңештин "Республика - Ата Журт" фракциясынын 17-февралдагы отурумунда депутат Таабалды Тиллаев өкмөт мүчөлөрүнөн Кыргыз өлкөсү эмнеге Евразиялык экономикалык биримдикке киргенин сурады. "ЕАЭБге кирүү боюнча өкмөттүн позициясы кандай? Кирүүнүн негизги максаты кандай эле?", - деп кызыкты депутат.

Экономика министри Арзыбек Кожошевдин жооп беришинче, эгер Кыргыз мамлекети аталган биримдикке кирбегенде, товарларды экспорттоо кыйын болуп калмак. "Дүйнөдө мамлекеттер аралык 200гө жакын уюм бар. Алардын 20сы ири уюмдар. Бүгүнкү мезгилдин талабы эл аралык уюмдарга интеграциялоо. Кыргыз өлкөсүнөн товарлардын көбү Казакстанга жана Орусияга экспорттолот. ЕАЭБге кирбегенибизде, бажы төлөмдөрү кыйла кымбаттап, ата мекендик өндүрүүчүлөргө оор болуп калмак", - деди чиновник.

Мындан тышкары Кожошев ЕАЭБге кирүү эмгек мигранттарына жеңилдиктерди түзгөнүн айтты. Депутат Тиллаев аны менен макул болгон жок. "Мигранттардын маселесин башка жол менен чечсек болмок", - деген пикирин айтты депутат.