Боинг кырсыгы: Биринчи вице-премьер 7 жашар Жакшылык жашап жаткан үйгө барды

16-январдагы авиакырсыкта ата-энесинен айрылган 7 жашар Жакшылык Шералиевге мамлекет тараптан бардык жардамдар берилет. Бул тууралуу 20-февралда Жакшылыктын чоң атасынын үйүнө барган биринчи вице-премьер-министр Мухаммедкалый Абылгазиев билдирди. Кырсыкта ата-энесиз калган эки баланын (Султан аттуу бала да ата-энесинен айрылган) билим алуусун каржылоого Түркия тарап даяр экенин, кыйынчылык жаралган учурда баланын жакындары өкмөткө кайрылса болорун белгиледи. Өкмөт мүчөсү менен пикир алышууда Жакшылыктын чоң атасы Шералы Сатыбалдиев оор күндө жардамын көрсөткөн элге ыраазычылыгын айтты.

Эскерте кетсек, 16-январда таңга маал "Манас" аэропортуна жакын жердеги Аэрофлот дачалык тилкесине Боинг 747 учагы кулаган. Жүк ташуучу учак үйлөрдүн үстүнө түшүп, 39 адамдын өмүрүн алган.