Саламаттыкты сактоо министри Талантбек Батыралиевдин кызматтан кетүүсүн талап кылгандар менен өзү жолукту

Бүгүн, 22-февралда Саламаттыкты сактоо министрлигинин алдына министр Талантбек Батыралиевдин жумуштан кетишин талап кылгандар митинг өткөрүшкөн.
Митингчилер "Улуттун генофонду коркунучта", "Саламаттыкты сактоо министрлиги - өлүктөрдү көмүү министрлиги", "Фарид жоголмоюн, Кыргызстан оңолбойт" деген жазууларды жазып алышкан.

"Кыргыз чоролору" коомдук бирикмесинин мүчөсү Жолалиев Калысбектин айтымында, Саламаттыкты сактоо министрлигиндеги коррупциядан улам бейтаптар бей ажал өлүм таап, кыйналып жатышат.

"Талантбек Батыралиев 2 жылда медицина тармагын гүлдөтөм деп келген эле. Мына канча жыл өтсө да, эч кандай жыйынтык жок. Жогору жакта булардын "крышасы" бар. Эгерде иштей албаса кетсин, ордуна татыктуу, билимдүү талапкер келсин", - дейт К. Жолалиев.

Учурда митингдин катышуучулары Талантбек Батыралиев менен жолугушуп, сүйлөшүүлөр жүрүп жатат.