Спикердин басма сөз катчысы кезексиз жыйын өткөрүү боюнча сүйлөшүүлөр жүрүп жатканын айтты

Жогорку Кеңештин төрагасы Чыныбай Турсунбековдун басма сөз катчысы Мирлан Токталиев бүгүн, 27-февралда журналисттерге билдиргендей, консултациялар жүрүп жатат.

"Ата Мекен" фракциясынын депутаты Алмамбет Шыкмаматов жана "Бир бол" фракциясынын лидери Алтынбек Сулайманов лидерлер чогулган жыйындан саат 12:30да чыкканда бир сааттан кийин дагы лидерлер төраганын кабинетине чогула турганын айтышкан. Бирок лидерлер азырынча чогула элек.

Айта кетсек, 25-февралда Башкы прокуратура Өмүрбек Текебаевге “коррупция” жана “алдамчылык” беренелери боюнча кылмыш ишин козгогон. Кылмыш иштин ачылышына орусиялык ишкер Леонид Маевскийдин билдирүүсү себеп болгону айтылган. Л.Маевский 2010-жылы "Альфа Телекомду" башкаруу укугуна ээ болуу үчүн ошол учурдагы убактылуу өкмөттүн төрайымынын орун басары, учурдагы Жогорку Кеңештин депутаты Өмүрбек Текебаевге 1 миллион доллар бергенин билдирген. Ө.Текебаев Венада ЕККУнун парламенттер аралык ассамблеясынын жыйынына катышып Кыргыз жерине Стамбул аркылуу учуп келген. Ал учактан түшөрү менен УКМК кызматкерлери депутатты кармап кетишкен. Текебаев 48 саатка УКМКга камакка алынган.