Ырчы Түмөнбай Колдошов ОшМУнун социалдык жана тарбия иштери боюнча проректору болуп дайындалды

Филология илимдеринин кандидаты, доцент, белгилүү ырчы, обончу Түмөнбай Колдошов Ош мамлекеттик университетинин социалдык жана тарбия иштери боюнча проректору болуп дайындалды. Жаӊы кызматы тууралуу ырчы SUPER.KG`ге буларды билдирди.

"Буга чейин бул кызматты Замир Божонов аркалап келген. Ал өз каалоосу менен жумуштан кеткенине байланыштуу анын ордуна мени дайындашты.

Ал эми чыгармачылык тууралуу айтсам, ал менин өмүрүм. Буюрса, чыгармачылыкты башка өӊүттө улантышым мүмкүн, мен аны таштай албайм. Эми жумуш менен баарын чогуу алып кетүүгө аракет кылам. Жакын арада жаӊы чыгармаларды күйөрмандарга тартуулайм", - дейт ырчы.

Белгилей кетсек, ырчы 1986-жылы Ала-Бука районунун Көк-Таш айылында туулган. Ош мамлекеттик университетин артыкчылык диплому менен бүтүргөн. Филология илимдеринин кандидаты. Обончу, аткаруучу. 40тан ашуун обон чыгарган. Илимий методика жана көркөм адабият боюнча 6 китептин автору. Буга чейин аталган окуу жайдын Рыспай Абдыкадыров атындагы маданий эстетикалык борборунун директору жана ушул эле окуу жайда кыргыз адабияты кафедрасынын доценти болуп эмгектенген.