12 куту димедрол дарысын саткан сатуучунун иши сотко өткөрүлүп берилди

12 куту димедрол дарысын саткан сатуучунун иши сотко өткөрүлүп берилди. Бул тууралуу бүгүн, 28-февралда SUPER.KG порталына Саламаттыкты сактоо министрлигинин алдындагы Дары менен камсыздоо департаментинен билдиришти.

"Жабырлануучунун арызынын негизинде димедрол сатылган дарыкананы текшерүүгө алдык. Жыйынтыгында сатуучу кызды административдик кодекстин негизинде сотко бердик. Бул ишти Октябрь райондук соту карамай болду. Алгачкы соттук отурум 3-мартка белгиленди. Кимдин канчалык күнөөсү бар аны сот чечет", - деп билдирди департаменттин жетектөөчү адиси.

Эске салсак, буга чейин 13-февралда Бишкек шаарынын тургуну, 21 жаштагы кыз 12 куту димедрол дарысын сатып алып, анын 30 даанасын ичип ооруканага түшкөн. Маалыматка ылайык, бейтапканага түшкөн кыздын апасы сатуучунун эрежеге ылайыксыз аракетин териштирүү максатында департаментке арыз жазган.