Башкы прокурор: "Маевскийдин статусу - арыздануучу"

"Текебаевге 1 миллион доллар бердим" деген Леонид Маевскийдин азыркы статусу - арыздануучу. Бул тууралуу 1-мартта Жогорку Кеңештин жыйынында башкы прокурор Индира Жолдубаева билдирди. Бир катар депутаттар Маевский кылмыштын катышуучусу экенин айтып жатышат.

Эскерте кетсек, "Ата Мекендин" лидери Өмүрбек Текебаевге 25-февралда Башкы прокуратура тарабынан кылмыш иши козголду. Депутат "коррупция", "алдамчылык" беренелери боюнча күнөөлөнүүдө. Орусиялык ишкер "Текебаев 2010-жылы менден 1 миллион доллар алган" деп көрсөтмө берген. Европадан Бишкекке Стамбул аркылуу учуп келген Текебаев 26-февралда "Манас" аэропортунан УКМКнын кызматкерлери тарабынан кармалып, 27-февралда Бишкектин Биринчи Май райондук сотунун чечими менен 2 айга камакка алынган.