Гүлнара Калдарова менен Айжамал Кабылова концертинде күйөрмандарына ыр майрам, көңүлдүү маанай тартуулашты (фоторепортаж)

1-март жаздын алгачкы күнүндө ырчылар Гүлнара Калдарова менен Айжамал Кабылова Бишкектеги Спорт Ордосунда жеке концертин өткөрүштү. Концертке Жеңишбек Айтиев, Темир Назаров, Замир Мырза, Данияр Эрматов "Кыз-Бурак" тобунун мурунку ырчылары Айпери Сыдыкова, Сайкал Садыбакасова жана башкалар катышышты.

"Жеке концерт болгондуктан, албетте, толкунданып жатабыз. Бул кечеде күйөрмандарга атайын жаздырган жаңы чыгармаларды, дуэттерди, трио чыгармаларды тартуулайбыз", - деген ырчылар күйөрмандарына ыр майрам тартуулашты.

Концертти "Эксклюзив" бий тобунун бийчилери баштап беришти. Алпаруучулук кызматты Жеңишбек Айтиев менен Манас Алыкулов аркалашты. Айжамал Кабылованын сахнада бут кийимин чечип ырдап, бийлегенин көргөн Жеңишбек Айтиев: "Айжамал карыбаптыр, 2 баланын энеси болсо дагы сахнада бийлеп жүрөт", - деп тамашалай кетти.

Ошондой эле сахнага ырчыларды куттуктап келген Гүлшайыр Садыбакасова өзү тарбиялап өстүргөн кыздарына чыгармачылык ийгилик каалап, батасын берди.

Кечеде эл сүйгөн "Жан-жан", "Ак куулардын арманы", "Күткүм келет" жана башка белгилүү хит чыгармалар, дуэт, триолор жаңырды. "Мен турмуштун сыноосуна кабылган учурда калың кыргыз элим, чыгармачылык мени сындырбай сактап калды. Андыктан баарыңыздарга ыраазычылык билдирип, таазим этем", - деген Айжамал Кабылованын "Турмуш сабагы" чыгармасын сахнадагы эл кол чабуулар менен коштоп жатты. Концерт соңунда патриоттук ыр "Кыргызстан" жана "Жолугушканча" деген ырлар аткарылып, жыйынтыкталды.