Депутат ипотекалык насыя алуу үчүн кайсы аймактан көп кайрылуу болуп жатканына кызыкты

Бүгүн, 2-мартта парламентте "Республика-Ата Журт" фракциясынын депутаты Рада Түмөнбаева ипотекалык насыя алуу үчүн кайсы аймактан көп кайрылуу болуп жатканына кызыкты.

Анда мамлекеттик ипотекалык компаниянын директорунун орун басары Нуржигит Үсөнакун уулу чоң шаарларда кайрылуу көп болуп жатканын айтты.

"Турак жай менен камсыздоо көйгөйү чоң шаарларга таандык. Бишкек, Ош, Жалал-Абад шаарларында көп кайрылат. Бирок бардык аймакта иштеп жатабыз. Алардын катарында алыскы тоолуу аймактар да бар", - деди Нуржигит Үсөнакун уулу.

Рада Туманбаева: "Былтыркы жылдын март айынан 7 миң жаран ипотекалык насыя алуу боюнча кайрылыптыр, бирок 830 эле жаранга берилген экен. Кандай тоскоолдуктар болуп жатат?" - деп суроо берди.

Компаниянын директорунун орун басары коюлган талаптарга жооп бербеген адамдар тизмеге кирип алганын айтты.

"Ипотекалык насыянын негизги талабы турак жайга муктаж адамдарга берүү болуп саналат. Айрымдар туура эмес түшунүп, үйлөрү бар болсо дагы тизмеге кирип алган", - деди ал.

Учурда Жогорку Кеңеште “Мамлекеттик ипотекалык турак жай насыясы жөнүндө” мыйзам долбоору экинчи окууда каралып жатат.