Депутат Саламаттыкты сактоо министринен жеке менчик ооруканаларды ким текшере турганын сурады

КСДП фракциясынын депутаты Асылбек Жээнбеков Саламаттыкты сактоо министри Талантбек Батыралиевден жеке менчик ооруканаларды ким текшере турганын сурады.

"Жеке менчик ооруканалардын кадр, каржы маселесин ким текшерет? Алар отчётту кимге берет?" - деп эл өкүлү суроо берди.

"Жеке менчик ооруканалардын каржы маселесин текшере албайбыз. Ал эми алардын кадр маселеси боюнча коюлган талабы мамлекеттик ооруканадан айырмасы жок. Отчётту болсо статистика комитетине берет", - деди министр.

Мындан тышкары депутат жеке менчик ооруканаларда орточо айлык канча экенине кызыкты. Министр орточо айлык тууралуу маалыматы жок экенин айтты. Ал билдиргендей, жеке менчик ооруканага 2008-жылы 1 миң доллар айлыкка тажрыйбалуу мээрман айым таба албай, чет өлкөдөн алып келишкен.

Жогорку Кеңеште саламаттыкты сактоо тармагынын абалы тууралуу КСДП фракциясынын жыйыны өтүп жатат.