Бишкекте эртең Евразия Өкмөттөр аралык кеңешинин кезектеги жыйыны өтөт

Евразия экономикалык биримдигине кирген мамлекеттердин Өкмөт башчылары эртең, 2017-жылдын 7-мартында, Бишкек шаарында Кыргыз Республикасынын Евразия экономикалык биримдигине төрагалыгынын алкагында Евразия Өкмөттөр аралык кеңешинин кезектеги жыйынын өткөрөт.

Иш-чарага Кыргыз Республикасынын премьер-министри Сооронбай Жээнбеков, Орусия Федерациясынын өкмөтүнүн төрагасы Дмитрий Медведев, Казакстан Республикасынын премьер-министри Бакытжан Сагинтаев, Беларусь Республикасынын премьер-министри Андрей Кобяков жана Армения Республикасынын премьер-министри Карен Карепетян, Евразия экономикалык комиссиясынын (ЕЭК) коллегиясынын төрагасы Тигран Саркисян катышат.

Евразия Өкмөттөр аралык кеңешинин кезектеги жыйыны тар чөйрөдө жана кеңири курамда өтөт. Жыйында интеграциялык биримдиктин алкагындагы маанилүү маселелер талкууланат. Евразия Өкмөттөр аралык кеңешинин кезектеги жыйынынын соңунда бир катар документтерге кол коюлат.