Гезит жана салфеткадан көйнөк тиккен абактагы кыз-келиндер өз өнөрлөрүн тартуулашты (фото)

Бүгүн, 6-мартта Сокулук районуна караштуу Степное айылында жайгашкан №2-аялдар абагындагы кыз-келиндер 8-март майрамына карата майрамдык концерт тартуулашты.

Концерттин жүрүшүндө кыз-келиндер коомдогу терс көрүнүштөрдү, жагымсыз окуяларды чагылдыруу менен көрүүчүлөргө шаң тартуулашты.

Иш-чаранын жүрүшүндө 33 жаштагы Шоола Исмаилова соңку 5 жылдан бери жаза мөөнөтүн өткөрүп жатканын айтты.

"8-март майрамына карата өткөрүлүүчү концертке биздин 4-бөлүктүн кыздары 2 ай бою даярдандык. Күн сайын эки жолу чогулуп, ар бир номерге даярданууга жетиштик. Башында салфеткадан көйнөк тигүү идеясын кыздар айтып чыгышты. Жыйынтыгында 3 кыз болуп 2 күн убакыт кетирип, салтанат көйнөгүн тигип чыктык. Буга 1800 даана салфетка короттук. Жыйынтыгында калыстардын жогорку баасын алдык", - деди Исмаилова.

Майрамдык концерттин жүрүшүндө 4 топко бөлүнүп жарышка түшкөн кыздар сахнада ырдап, бийлеп гана тим болбостон, андан сырткары чеберчилик өнөрлөрүн көргөзүп калыстардын сынынан өтүштү. Ар бир топ гезит барактарынан жана клеёнканын кесиндилеринен кооз көйнөк тиккен. Дагы бири гүлдөн жасалган көйнөгүн сунуш кылды.

"Учурда №2-абакта 300дөй кыз-келин жаза мөөнөтүн өтөшөт. 2 жашы жетелек өспүрүм кыз, пенсия жашындагы 6 аял бар. Алардын баарына жашоого ыңгайлаштырылган шарт түзүлгөн. Бүгүнкү күндө эркинен ажыратылган 200 кыз түрдүү жумуштарда иштешет. Аларга айлык маяна төлөнүп берилет. Биздин шартта кийим жана бут кийим тигүүчүлүк тармагында иштесе болот. Ошондой эле нан чыгаруучу цехте эмгектенишет. Абактагылар эркиндикке чыкканча жогорку деңгээлдеги адистикке окуу мүмкүнчүлүгү да бар", - деп билдирди аялдар абагынын башчысы Амангазы Искендеров.