Мамлекеттик мүлктү башкаруу фонду "Альфа Телекомдун" баасын 13,5 миллиард сомго баалап, кайрадан аукционго койду

Мамлекеттик мүлктү башкаруу фонду "Альфа Телеком" (Мегаком) ЖАКын 13 миллиард 500 миллион сомго кайрадан сатыкка койду. Бул тууралуу 7-марттагы маалымат жыйынында фонддун төрагасы Болсунбек Казаков билдирди.

Анын айтымында, 3-мартта Мамлекеттик мүлктү башкаруу фонду тарабынан "Альфа Телекомдун" 100 пайыз акциясынын баасы бекитилип, аукционго коюлган. Аукцион ушул жылдын 3-июнунда өтөт.

"Компаниянын 100 пайыздык үлүшү 19,7 миллиард сомго бааланганда сатып алуу боюнча билдирүүлөр түшкөн жок. Мындан улам аукцион өтпөй калды. Андан кийин баа 25 пайызга төмөндөтүлүп, 14 миллиард 255 миллион сом болду. Анда дагы аукцион өтпөй калды. Мүлктү мамлекетке кайтаруу программасынын алкагында Жогорку Кеңеш токтом чыгарган. Комиссия түзүлүп, баа 13,5 миллиард сомго өзгөртүлдү. 3-мартта расмий түрдө башталды. Аукционго кызыккандардын саны өсүп жатат",- дейт Казаков.