Аксылык 28 жаштагы 7 баланын энесине "Баатыр эне" наамы бериле элек

28 жаштагы Акбарчын Самарбек кызы 7 баланын энеси "Баатыр эне" наамын албай келет. Ал Жалал-Абад облусунун Аксы районундагы Тегене айылында өмүрлүк жолдошу Келсинбек Өмүркулов, балдары жана жолдошунун ата-энеси менен бирге турат. Акбарчын Самарбек кызы жолдошуна 18 жашында турмушка чыккан. Өзү 5 бир тууган, ал эми Келсинбек Өмүркуловдун 11 бир тууганы бар. Кайын энеси 79 жашта, "Баатыр эне" наамынын ээси.

"Биз кыз-жигит катары сүйлөшүп жүрүп үйлөнгөнбүз. Баш кошконубузга он жылдан ашты. 4 уул, 3 кыздуу болдук. Эң улуу уулубуз 4 класста окуйт, ал эми эң кичүү кызыбыз 3 айга толду. Балдарыбыздын баары удаа төрөлгөн. Учурда балдарга жөлөк пул алабыз", - дейт Келсинбек Өмүркулов.

Бул үй-бүлө негизинен мал чарбачылык менен алектенет. Жайкысын айылдаштарынын малын чогултуп, жайлоого чыгышат.

7 баланын энеси "Баатыр эне" наамын алуу үчүн буга чейин айыл өкмөткө керектүү документтер менен кайрылганда, эң кичүү кызы 1 жашка толгондон кийин наам бериле тургандыгын түшүндүрүшкөн.