Бүгүн Бишкекте Текебаевдин тарапташтары митинг өткөргөнү жатышат

Бүгүн, 9-мартта саат 13:00дө Бишкектеги "Ала-Тоо" аянтында Жогорку Кеңештин "Ата Мекен" фракциясынын лидери Өмүрбек Текебаевдин тарапташтары митинг өткөргөнү жатышат. Бул тууралуу партиянын өкүлдөрү билдиришти. Маалым болгондой, бүгүн саат 16:00дө Бишкек шаардык сотунда Текебаев менен экс-депутат Дүйшөнкул Чотоновдун баш коргоо чарасы каралмакчы.

Айта кетсек, 25-февралда Башкы прокуратура Өмүрбек Текебаевге “коррупция” жана “алдамчылык” беренелери боюнча кылмыш ишин козгогон. Кылмыш иштин ачылышына орусиялык ишкер Леонид Маевскийдин билдирүүсү себеп болгону айтылган. Л.Маевский 2010-жылы "Альфа Телекомду" башкаруу укугуна ээ болуу үчүн ошол учурдагы убактылуу өкмөттүн төрайымынын орун басары, учурдагы Жогорку Кеңештин депутаты Өмүрбек Текебаевге 1 миллион доллар бергенин билдирген. Ө.Текебаев Венада ЕККУнун парламенттер аралык ассамблеясынын жыйынына катышып Кыргыз жерине Стамбул аркылуу учуп келген. Ал учактан түшөрү менен УКМК кызматкерлери депутатты кармап кетишкен. 27-февралда Бишкектин Биринчи Май райондук соту Текебаевдин баш коргоо чарасын карап, 2 айга камакта калтырган.