Бириккен Араб Эмираттарында никесиз жыныстык катнашка барган түгөйлөр камакка алынды

Бириккен Араб Эмираттарында никесиз жыныстык катнашка барган деген түгөйлөр кармалып, камакка алынган. Бул тууралуу чет элдик басылмалар жазып чыгышты.

Маалыматка караганда, Түштүк Африка Республикасынын 29 жаштагы жараны Эмлин Калвервел жана украиналык 27 жаштагы Ирина Ногайдын жакын мамиледе болгону кыздын кош бойлуу экендигин дарыгерлер аныктагандан кийин белгилүү болгон.

Араб өлкөлөрүндө никесиз жыныстык катнашка баруу - мыйзамды бузуу болгондуктан түгөйлөр тартип сакчыларына өткөрүлүп берилген. Жигиттин апасы Линда Карвелвел аларды коё берүүлөрүн суранып, "Алардын жалгыз катасы - бири-бирин сүйүп калгандыгы", - деген.

Ал эми жигиттин өлкөсү мындай мыйзам бузууда эч кандай жардам көрсөтө албай тургандыгын билдирип, сүйүшкөндөрдү укук коргоочуларга кайрылууну сунуштаган.

Белгилей кетсек, Эмлин Карвервел Бириккен Араб Эмираттарында акыркы беш жылдан бери иштейт. Сүйүшкөндөр ушул жылдын январь айында кармалган, бирок бул тууралуу коомчулукка эми гана белгилүү болгон. Азырынча аларга карата эч кандай чечим чыга элек, эгер сот аларды күнөөлүү деп тапса, көп жылга темир тор артына киргизилиши мүмкүн.