Эртең январда болгон авиакырсыктан жабыркагандарга 2 миллион сом таратылат

2017-жылдын 16-январында “Манас” эл аралык аэропортунан алыс эмес жайгашкан Куруучулар башкармалыгынын дачаларындагы авиакырсыктан жабыркагандарга эртең, 10-мартта "Элим, барсыңбы?" коомдук кайрымдуулук фонду жана “JIA” Бизнес Ассоциациясы бирге чогулткан 2 миллион сом жардамды таратат. Бул тууралуу аталган фонддон билдиришти.

"Авиакырсык көптөгөн жарандардын өмүрүн алып, үйлөрүн кыйратты. Бул каргашалуу окуяга кайдыгер карабай, жардам берүү максатында акча каражатын чогултуу акциясы уюштурулган. Жыйынтыгында 2 миллион сом чогулду. Эртең, 10-мартта каза тапкандарга куран окутулуп, үй-бүлөлөрүнө жогоруда айтылган акча каражаты таратылмакчы", - деп айтылат маалыматта.

Иш-чарага депутаттар Абдувахап Нурбаев жана Жанар Акаев, Өзгөчө кырдаалдар министрлигинин, Эмгек жана Социалдык өнүгүү министрлигинин, ММК, Саламаттык сактоо министрлигинин өкүлдөрү, фонддун кызматкерлери катышары белгилүү болду.