Дүйнөдөгү эң узун бойлуу өспүрүмгө 3D-принтерден бут кийим чыгарылды

Дүйнөдөгү эң узун бойлуу өспүрүм, АКШнын Мичиган штатынын тургуну, 19 жаштагы Брок Браунга 3D-принтердин жардамы менен бут кийим чыгарышты. Мындай маалыматты бүгүн, 9-мартта чет элдик маалымат каражаттары жазышты.

Б.Браундун боюнун узундугу 233 сантиметр, бутунун өлчөмү 60. Ал бала чагынан Сотос синдромунан (церебралдык гиганттык) жабыркайт. Бул ооруга Жер шарынын жашоочуларынын 15 миңден бири чалдыгат. Мындан тышкары бул илдетке кабылгандардын тизелери, белдери ооруп турат. Б.Браун "Гиннесстин рекорддор китебине" дүйнөдөгү эң узун бойлуу тинейджер катары кирген. Ал эми 3D-принтерден чыккан бут кийимди ага калифорниялык компаниялардын бири жардам катары берген. Буга чейин Б.Браун бут кийимдерин 400, 500 долларга буюртма менен жасатып келген. 3D-принтерден басылып чыккан бут кийимдер ага андан арзаныраак баада, 99дан 250 долларга чейинки баада сатылат.