Бишкекте окуучуларга ысык тамак берүүнүн жаңы модели киргизилди

Борбордогу №64-мектепке биринчилерден болуп тамак берүүнүн жаңы модели киргизилип, башталгыч класстардын окуучуларына ысык тамак бериле баштайт. Бул тууралуу Бириккен Улуттар Уюмунун расмий сайты 9-мартта жарыялады.

Маалыматка караганда аталган мектепте оңдоо иштери жүргүзүлүп, ашпозчулар кесиптик деңгээлин жогорулатуу үчүн окутуудан өтүшкөн. Бүткүл дүйнөлүк азык-түлүк программасынын алкагында электр мештери, идиш жуугуч машина, муздаткыч сыяктуу жабдуулар алынган.

"Буга чейин айыл жергесиндеги мектептерде ысык тамак берилип келген. Мындан улам Бишкек шаарынын жетекчилиги шаардагы окуучулардын тамак-ашын жакшыртууну демилгелеп чыгышты. Окуучуларга тамак берүү программасын Орусия Федерациясы каржылап, 12 миллион доллар бөлгөн. Азыр 85 миңге жакын башталгыч класстын окуучуларына ысык тамак берилет", - деп айтылат маалыматта.