SUPER.KG порталынын кабарчысына кол көтөргөн аял административдик жазага тартылды

Бүгүн, 3-майда Свердлов райондук сотунун имаратында SUPER.KG порталынын кабарчысы Ширин Жумадиловага кол көтөргөн Жаннат Акматовага байланыштуу сот отуруму өттү. Айыпталуучу кылган айыбын моюнга алды. Сот ишине төрагалык кылган судья Мелис Абдухалыков КРнын Административдик жаза кодексинин 364-беренесинин 1-бөлүгү боюнча Жаннат Акматовага 300 сом айып пул төлөө менен 8 саатка коомдук ишке тартыла тургандыгы тууралуу чечим чыгарды. Чечим чыгарууда Ж.Акматованын 7 жаштагы жаш кызын жана студент баласын жалгыз өзү карай турганы эске алынды. Эске салсак, кечээ, 2-майда Бишкек шаардык сотунда "ата журтчу" 3 депутат боюнча өтүп жаткан соттук отурумда жыйынга катышуучулардын бири кесиптешибиз Ширин Жумадилованы маданиятсыз сөздөр менен сөгүп, аны жулкулдатып, отурган ордун тартып алып, фотоаппаратын, нетбугун ыргытып жиберүүгө аракет жасаган. Сот отурумунан чыккан соң да журналисттердин аброюна шек келтирүүчү сөздөрдү жаадырган.