Жакында чыга турган Samsung Galaxy S8 жана Galaxy S8 Plus смартфондорунун болжолдуу сүрөттөрү жарыяланды

Samsung компаниясынын жакында чыга турган Galaxy S8 жана Galaxy S8 Plus смартфондорунун болжолдуу жаңы сүрөттөрү интернетке жарыяланды. Бирок бул телефондордун дизайны сүрөттө көрсөтүлгөндөй чыгат деп, кесе айтуу эрте. Себеби телефондордун толук бүткөн варианты жарым айдан кийин, 29-мартта коомчулукка көрсөтүлөрү айтылууда.

Коомчулукта бул телефондордун көрүнүшү кандай экенине кызыккандар көп. Ал эми сүрөттө жаңы смартфондордогу манжа изинин сканери анын арткы бөлүгүндө, камеранын жанында жайгаштырылган. Андагы Home баскычы Galaxy S7'никиндей баскыч эмес, сенсордук болуп көрүнүп турат. Сүрөттөргө караганда Galaxy S8 жана Galaxy S8 Plus смартфондорунда капталын көздөй ийилген экраны, ичке рамкасы жана жаңы USB-C тибиндеги туташтыруучу уячасы бар. Ошондой эле телефон кулпуга түшүп турганда капталындагы дисплейден билдирүүлөр менен сааттан тышкары Home виртуалдык баскычын дагы көрүүгө болот.

Маалыматтарда жаңы смартфондордун экраны 5,8, 5,2 дюйм, 2560x1440 пикселдүү ийилген AMOLED-экраны менен негизги камерасы 12 мегапиксель, алдыңкысы 8 мегапиксель болору айтылууда.