Кочкордо Орто-Токой суу сактагычында уруксатсыз балык уулагандардын 3 кайыгын мамлекеттин менчигине өткөрүү аракети көрүлүүдө

Кочкор районунун Орто-Токой суу сактагычында мыйзамсыз балык уулаган 3 жаран кармалды. Бул тууралуу Мамлекеттик экологиялык-техникалык инспекция кабарлады.

"3 жаран эч кандай уруксат кагаздары жок сига балыктарын ташып, 2 жөнөкөй жана 1 моторлуу кайык, торлору менен мыйзамсыз балык уулагандары аныкталды. Алардын экөө Арзыкул Мааразыков жана Чоро Саадабаев Ысык-Көл облусунун Ак-Өлөң айылынын тургундары. Ал эми бирөө Кубатбек Боктоканов Кочкор районунун Семиз-Бел айылынын тургуну. Жеринде аталган жарандарга карата тийиштүү протоколдор толтурулуп, жаратылышка келтирилген чыгашасы үчүн жалпысынан 36360 сом доо коюлуп, бүгүнкү күндө толугу менен мамлекеттин эсебине өндүрүлдү", - деп жазылат инспекциянын маалыматында.

Бүгүнкү күндө Мамэкотехинспекциянын адистери 2 жөнөкөй жана 1 моторлуу кайыкты Мамлекеттин эсебине конфискациялоо боюнча сотко кайрылышканы маалым болду.

Эске сала кетсек, көлдөрдө балыктардын санынын азайып бара жаткандыгына байланыштуу, тор салууга жана уруксатсыз балык кармоого тыюу салынган.