Баласына жол кире акысын таба албай калган энеге райондук социалдык өнүгүү башкармалыгы жардам бере албайт

6-мартта ден соолугунан мүмкүнчүлүгү чектелген жолдошу менен уулун жалгыз баккан Гүлсада Иманкулова тууралуу баяндаган элек. Гүлсада Иманкулованын үй-бүлөсүндө 5 адам жашайт. Бул үй-бүлөдө ден соолугунан мүмкүнчүлүгү чектелген 18 жаштагы Билимжан уулу Шержандан тышкары дагы 2 уулу бар. Жолдошу Билимжан Сарпашовдун да мүмкүнчүлүгү чектелген, жумушу жок. Сарпашовдордун үй-бүлөсү мектепте окуган баласына жумшалуучу төлөмдөрдөн бошотууну суранышкан.

Бүгүн, 14-мартта SUPER.KG порталына Сокулук райондук социалдык өнүгүү башкармалыгы бул үй-бүлөгө материалдык жардам көрсөтө албастыгын билдирди.

"Бул үй-бүлө Жалал-Абад облусунун Токтогул районуна караштуу Толук айылында каттоодо турушат. 2013-жылы Курулуш башкармалыгынын дачаларынан №80-тилкесин сатып алышкан. Үйү 2 бөлмөлүү.

Үй-бүлө 5 кишиден турат:

1. Гүлсада Иманкулова 1973-жылы туулган, иштебейт.
2. Жолдошу - Билимжан Сарпашев 1969-жылы туулган, 2-топтогу майып, Токтогул районуна караштуу социалдык фонд аркылуу 3500 сом пенсия алат.
3. Баласы - Эржан Билимжан уулу 1994-жылы туулган, студент контракттык негизде окуйт, тигүүчү цехинде иштейт.
4. Баласы - Ш.Б. уулу 1998-жылы туулган, 2-топтогу майып, Токтогул районунун социалдык өнүгүү башкармалыгы тарабынан 2875 сом жөлөк пул алат.
5. Баласы - А.Б. уулу 2003-жылы туулган, 7- класста Ат-Башы орто мектебинде окуйт.

Сокулук райондук социалдык өнүгүү башкармалыгы 2 тепкичтүү бюджет болгондугуна байланыштуу материалдык жардам көрсөтүүгө мүмкүнчүлүгү жок", - деп билдиришти мекемеден.

Ошондой эле башкармалык Новопавловка жана Ат-Башы айыл өкмөттөрүнө Гүлсада Иманкулованын үй-бүлөсүнө материалдык жана гуманитардык жардам көрсөтүү боюнча Сокулук РСӨБ атынан кат жөнөтүлгөнүн кошумчалашты.