Мамлекеттик тилди өнүктүрүүгө 2017-жылы 204 миллион сом каралды

Кыргыз Республикасынын мамлекеттик тил боюнча улуттук комиссия маалымат жыйын өткөрдү. Жыйында тил комиссиянын төрагасы Назаркул Ишекеев 141 даана тилди өнүктүрүүгө багытталган адабияттар, сөздүк китептер жарык көргөнүн айтты.

"Учурда мамлекеттик тилди үйрөнүүдө онлайн машыгуу программасы иштеп жатат. Бул программага мамлекеттик кызматкерлер кирип жатышат. Мындан ары 1-жолу милдеттүү түрдө аспирантура жана башка илим жактагандар мамлекеттик тилден сынак тапшырышат. Бүгүнкү күндө 141 даана тилди өнүктүрүүгө багытталган адабияттар, сөздүк китептер жарык көрдү", - деп билдирди Ишекеев.

"Бишкек шаары менен Чүй облусунда сот отурумдары көбүнчө расмий тилде өтөт. Ал эми башка аймактарда кыргыз тилинде өтөт. Ал эми көчөлөргө илинген жарнамаларга, жайылтуучулар менен буйрутмачылар жоопкер болот. 2016-жылы 4568 жарнама алынып салынган", - деп билдирди Мамлекеттик тил боюнча улуттук комиссиянын котормо бөлүмүнүн башкы адиси Мундузбек Абдыжапар уулу.

Маалымат жыйынында мамлекеттик тилге акыркы 4 жыл ичинде тилге көңүл буруу жакшырып жатканы айтылды.

"Быйыл 2017-жылы Республика боюнча тилдин абалын байкоого мониторинг жүргүзүлөт.
Улуттук программанын алкагында мамлекеттик тилди өнүктүрүүгө 2017-жылы 204 миллион сом каралган", - деп билдирди төраганын орун басары Медербек Аким уулу.