Алмазбек Атамбаев: "Өлкөнү кайрадан мародёрлордун колуна салып бербейли"

Мамлекет башчы Алмазбек Атамбаев 15-мартта 5 өлкөнүн элчилеринен Ишеним грамоталарын кабыл алуу аземинде элди сабырдуулукка үндөдү.

"Азыркы күндөрдө элибиздин, жерибиздин тагдыры, келечеги чечилип жатат. Алдыда президенттик шайлоо турат, болгону 8 ай калды. Тырмактай Кыргыз мамлекети эмес, дүйнөнү башкарган Америка кантип президент шайлаганын дагы эле түшүнбөй, териштирип жатат. Биз да декабрда алаканыбызды чаап, "аттиң" деп отуруп калбайлы. Азыр бүт дүйнөдө согуш жүрүп жатат, маалымат согушу. Шылуундарга алданып, маңкурт, эл бузарларды ээрчип, алар тараткан ушактарга ишенип, кайрадан карегибиздей мекенибизди уурулардын, мародёрлордун колуна салып бербейли. Кыргыз мамлекети кайрадан куркулдаган кузгундарга жем болбосун! Көздү ачып, ойлоно турган мезгил келди. Жараткан элибизди сасык саясатчылардан, ушакчылардан сактасын", - деди президент.