"ЭЛДИК КАБАРга" жооп: Ветеринардык инспекция: "Козулардын өлүшү ашказандагы сүт аш болбой уюп калышында"

Токтогул районунда, Жаңы-Жол айыл өкмөтүнүн Кызыл-Туу айылында 70 баштан ашык жаңы туулган козу-улак өлдү. Бул тууралуу бүгүн, 16-мартта SUPER.KG порталына Токтогул райондук ветеринардык жана фитосанитардык инспекциянын башчысы Алмагүл Сапаркулова билдирди.

"Бүгүнкү күндө бир эле айылдан 71 баш жаңы туулган козу өлгөн. Мындан улам аларды райондук лабораторияга алып келип, дартты аныктадык. Козулардын өлүп жатканы малдарды кармоо шарты талапка жооп бербей жаткандан улам болуп жатат. Айрым учурларда малдар асты кургак эмес, суук жерде кармалып, ашказанында сүт аш болбой, уюп жатат. Ага карабай, өлгөн малдардын канын, жеген тоютун, сүтүн алып республикалык дартты аныктоо борборуна жибергенбиз. Жыйынтыгы 3-4 күн ичинде чыгат", - деп билдирди Сапаркулова.

Маалыматка ылайык, жаш козулардын массалык өлүшү буга чейин аталган айылда катталган эмес.

Эске салсак, окурман "Элдик кабарга" жаңы туулган козулар белгисиз себептерден улам өлүп жатканын кабарлаган.