Чоң-Алай районунда кар көчкүдөн жабыркаган үй-бүлөгө 100 миң сом жардам берилет

Чоң-Алай районунун Жар-Баш айылында кар көчкүдөн жабыркаган үй-бүлөгө акчалай жардам берилет. Бул тууралуу бүгүн, 17-мартта Мамлекеттик камсыздандыруу уюмунун Ош облусундагы бөлүмүнүн башчысы Таалайбек Кулмырзаев билдирди.

"Чоң-Алай районундагы Мамаразак Мусаевдердин турак жайы калың жааган кардан улам 23-24-февраль күндөрү жабыркаган болчу. Алардын үй-бүлөсүнө Мамлекеттик камсыздандыруу уюмунан 100 миң сом акчалай жардам берилет", - деп билдирди Кулмырзаев.

Чоң-Алай районунун акими Жумадилла Жапаров: "Кар көчкүдөн жабыркаган үй-бүлөлөргө камкордук көрүлүп жатат. Күн жылып баштаганда Жаш-Тилек айылындагы эки үй-бүлөнү да көчүрүү аракети башталат", - деди.