Телефондогу сүйлөшүүнү сыртка угузбай турган "тумшук кап" Америкада ойлоп табылды

Америкалык инженерлер телефондо сүйлөшүп жаткан адамдын үнүн айланасындагыларга угузбай турган "тумшук кап" ойлоп табышты. Hashme деп аталган бул буюм жумушта же тынч жерде отурганда, жаныңыздагы адамдарга тоскоол болбой телефондо сүйлөшө берүүгө шарт түзөт. Анын көрүнүшү иттерге кийгизе турган тумшук капты эстетет.

Гаджетти ойлоп тапкандар аны "Дүйнөдөгү биринчи мобилдик телефондор үчүн маска" деп аташкан. Аны иштеп чыккандардын пикиринде, жаңы ойлоп табуунун жардамы менен, жадакалса коомдук жайларда да жакындарыңыз менен купуя сырларды бөлүшө берсеңиз болот.

Hashme`де жаныңыздагы адамдарга үнүңүздү такыр эле угузбай коюудан тышкары сүйлөшүүңүздү жашыруун кылуунун дагы бир жолу бар. Башкача айтканда, анда жайгашкан динамик добушуңузду чымчык, шамал, океан, жамгыр, маймыл, тыйын чычкан же мультфильм, тасмалардагы каармандардын үнүндөй кылып өзгөртүп коюучу касиетке ээ.

Гаджет үндөрдү тандоочу жана анын бийиктигин башкара турган тиркеме менен иштейт. Ойлоп табуу ушул жылдын аягында өндүрүлө баштап, баасы 249 доллар (болжол менен 17 миң сом) болору айтылууда.