Кыргыз мамлекетине Казакстандын өкмөтү тарабынан 41 миллион доллар бөлүү боюнча протоколго кол коюлду

Бүгүн, 17-мартта Москвада өткөн Евразиялык экономикалык биримдиктин комиссиясынын жыйынында Кыргыз Республикасынын өкмөтү менен Казакстандын өкмөтүнүн ортосунда 41 миллион доллар бөлүп берүү тууралуу протоколго кол коюлду. Бул тууралуу Экономика министрлигинин басма сөз кызматы билдирди.

Белгилүү болгондой, техникалык жактан колдоо көрсөтүү жөнүндөгү 2016-жылдын 26-декабрындагы протоколдо мурун каражат 7 526 789 доллар деп жазылган. Жыйында ага өзгөртүүлөр киргизилген.

"Кол коюлган протоколго өзгөртүүлөр киргизилип техникалык жактан жардам берүүнүн суммасы 41 038 096 долларга чейин жогорулады", - деп айтылат маалыматта.

Маалыматка караганда эки өлкө ортосундагы макулдашуу Евразиялык экономикалык интеграциянын шарттарында кызматташууну өнүктүрүүгө багытталган. Ал эми протоколдор Кыргыз Республикасынын ЕАЭБге киришинде жол картасын түзүүгө 100 миллион доллар өлчөмүндө жардам көрсөтүү каралган. Макулдашууга ылайык, жардам этап менен бөлүнүп берилет.