"Вечерний Бишкектин" мурдагы ээси Александр Кимди суракка алып кетүү үчүн анын үйүнө келишкен каржы полициясы кетти

22:10. Экономикалык кылмыштарга каршы күрөшүү кызматынын кызматкерлери Александр Кимдин үйүнөн кетишти. Бул тууралуу SUPER.KG порталына парламенттин экс-депутаты Асия Сасыкбаева билдирди.

"Экономикалык кылмыштарга каршы күрөшүү кызматынын кызматкерлери Кимдин үйүнө келишип, кечки саат 19:20да "жүрүңүз кеңсеге барып сурак бересиз" дешти. 3 сааттан бери алар менен сүйлөшүп жаттык. Алардын колдорунда камакка алууга керектүү мыйзамдуу кагаз жок экен. Сүйлөшүүлөрдүн жыйынтыгында Ким суракка баруу тууралуу милдеттенме жазды", - деди Сасыкбаева.

21:50. Александр Кимдин кан басымы көтөрүлдү. Бул тууралуу аны текшерген Тез жардам кызматынын дарыгери тастыктады. Анын айтымында, Кимдин ден соолугу үчүн жакынкы күндөрү ага тынчтык керек.

21:30. Александр Ким 22-мартта саат 14:00дө Экономикалык кылмыштарга каршы күрөшүү кызматына суракка баруу тууралуу милдеттенме жазды.

21:20. Кимдин үйүнө келген тергөөчү Арзыбек Жакишев андан 22-мартта Экономикалык кылмыштарга каршы күрөшүү кызматына суракка келүүсүн милдеттендиргени жатат.

20:35. Экономикалык кылмыштарга каршы күрөшүү кызматынын кызматкерлери, эгер Александр Ким суракка баруудан баш тартса, аны күч менен алып кетерин айтышты.

20:20. Кимдин үйүнө Жогорку Кеңештин депутаты Наталья Никитенко, экс-депутат Асия Сасыкбаева, укук коргоочулар Динара Ошурахунова, Бурул Макенбаева, коомдук ишмер Эльмира Ибраимова келишти. Алар каржы полициясынан эмнеге Кимди алып кетүүгө келишкенин түшүндүрүүнү талап кылышууда.

20:05. Кимдин жактоочусу Сергей Воронцов келди. Аталган кызматтын өкүлү Жеңишбек Асанов Ким 6-мартта издөөгө алынганын айтты.

18:50. "Жети адам келди. Ага карата кылмыш иши козголуп издөөдө экенин айтышты. Кызматкерлер документтерин көрсөтүшкөн жок, фамилияларын дагы айтуудан баш тартышты", - дешти Кимдин туугандары.

18:40. Бүгүн, 17-мартта "Вечерний Бишкек" Жабык Акционердик коомунун мурдагы ээси Александр Кимди суракка алып кетүү үчүн анын үйүнө Экономикалык кылмыштарга каршы күрөшүү кызматынын өкүлдөрү келишти. Бул тууралуу анын туугандарына шилтеме берип Заноза жазып чыкты.

Экономикалык кылмыштарга каршы күрөшүү кызматынын басма сөз кызматына байланышканыбызда А.Кимдин кармалышы тууралуу азырынча маалымат жок экенин билдиришти.

Айта кетсек, Александр Кимдин айынан көп жылдык кирешеден куру калганын айткан Александр Рябушкин 2015-жылы өз пайдасына Александр Кимден 388 миллион сом өндүрүп берүүнү соттон өтүнгөн. Сот ал талапты канааттандырган, бирок Кимдин мүлкү жок болгондуктан аталган сумма табылган эмес. Рябушкин анын ордуна Кимге таандык акцияларды өткөрүп берүүнү өтүнгөн. Биринчи Май райондук соту бул өтүнүчтү канааттандырып, Рябушкин “Рубикондун” 100 пайыз ээси болуп калган.