Францияда жубайлар үйүнүн жер төлөсүнө катылган алтын жана күмүш монеталарын таап алышты

Францияда жубайлар үйүнүн жер төлөсүнөн алтын жана күмүш монеталары салынган кумганды таап алышты. Бул тууралуу 20-мартта чет элдик басылмалар жазып чыгышты.

Маалыматка караганда жубайлар табылган монеталарды эсептеп анын 2968 даанасы күмүш, 17си алтын экенин аныкташкан. "Монеталарда 1473-1610-жылдар аралыгындагы дата көрсөтүлгөн. Алардын арасында Испанияны падыша Филипп II башкарып турган мезгилде Севилья шаарында жасалганы дагы бар. Табылга азыркы күндө канча суммага бааланары айтыла элек", - деп айтылат маалыматта.

Монеталар табылган үй 1580-жылы курулганы белгилүү болду. Франциянын мыйзамы боюнча катылган мүлккө таап алган адам ээлик кылат. Бирок бийлик 5 жыл аралыгында тарыхый баалуулук катары саналган буюмдарды изилдөөгө укуктуу. Андан кийин кымбат баалуу буюмдар ээсине кайтарылып берилет.