Ысык-Көлдө Ананьево-Чолпон-Ата жолунда каза болгон ымыркай үчүн оорукананын башчысы жумуштан кетти

Үстүбүздөгү жылдын январь айында Ысык-Көлдөгү Ананьево айылында толугу менен төрөлбөй, каза болгон ымыркай үчүн оорукананын башчысы жумуштан кетти. Бул тууралуу бүгүн, 22-мартта Саламаттыкты сактоо министрлигинин медициналык жардам көрсөтүү башкармалыгынын башкы адиси Раиса Асылбашева SUPER.KG порталына билдирди.

"Бул иш тууралуу министрликтен буйрук чыккан. Ага ылайык, оорукананын башчысы жумуштан кетип, башка дарыгерлерге, үй-бүлөлүк медицина борборлорунун башчыларына сөгүш берилди. Ал эми төрөттү кабыл алган акушер пенсияда экен. Аны да жумуштан кетирүү талабы коюлду. Учурда иликтөө иштери дагы да уланып жатат", - деди Р.Асылбашева.

Адистин айтымында, бул окуядан кийин Ысык-Көл облусу боюнча дарыгерлерге түшүндүрүү иштери жүрүп жатат.

"Биз бул окуядан сабак алдык, кайсы жерибиз начар экенин билдик. Ошол жагын жакшыртуу аракетин көрүп жатабыз", - деп кошумчалады башкы адис.