Британия мусулман өлкөлөрүнөн барган учактардын салонуна гаджеттерди алып кирүүгө тыюу салды

Британиянын бийлиги Түркия, Ливан, Иордания, Египет, Тунис жана Сауд Арабиядан учуп келе жаткан учактардагы жүргүнчүлөргө көлөмү смартфондон чоң электрондук каражаттарын учактын салонуна алып кирүүгө тыюу салды. Бул тууралуу чет элдик басылмалар жазып чыгышты.

Мындай чечимди бийлик өкүлдөрү коопсуздук үчүн, террордук актылардан коргонуу максатында кабыл алышкандыгын айтышкан. Алардын пикиринде, чоңураак гаджеттерде жарылуучу заттарды алып кирүүгө мүмкүн. Жаңы эрежеге ылайык, учактын салонуна ноутбук, планшет, DVD-плеер жана башка чоң смартфондорду алып кирүүгө болбойт.

6 өлкөдөн келе жаткан жүргүнчүлөр узундугу 16 сантиметр, туурасы - 9,3 сантиметр, калыңдыгы 1,5 сантиметрден ашпаган параметрлердеги гаджеттерди гана жанына алып алса болот. Андан чоң электрондук гаджеттер жүктөр менен кошо тапшырылат. Мындай чечим 25-мартта күчүнө кирери айтылган.

Маалыматтарга караганда буга чейин АКШ 8 өлкөдөн келе жаткан учактардын салонуна чоң гаджеттерди алып кирүүгө тыюу салган эрежени киргизген.