Дордой конушуна жакын жерде Кызыл китепке кирген жаныбарлардын терисин мыйзамсыз сатып жаткан жаран кармалды

Экологиялык коопсуздук башкармалыгы тарабынан кызыл китепке кирген жаныбарлардын терисин мыйзамсыз сатып жаткан жаран кармалды. Бул тууралуу Мамлекеттик экологиялык-техникалык инспекциянын басма сөз кызматы бүгүн, 25-мартта кабарлады.

"Ыкчам иш-аракеттердин жүрүшүндө 24-мартта экологдор тарабынан Бишкек-Торугарт автожолунун боюнан, Аламүдүн районунун Дордой конушуна жакын жерде уруксат кагаздары жок, кызыл китепке кирген жаныбарлардын терилерин сатып жаткан Элеман Абыкеев аттуу жаран кармалган. Анын унаасынан күрөң аюнун терисинен жана 1 текенин башынан жасалган экспонаттар, 8 карышкырдын, 3 түлкүнүн терилери, 3 түлкүнүн терисинен жасалган малакайлар табылган", - деп жазылат маалыматта.

Жеринде экологдор акт толтуруп, терилер тартылып алынган.

Учурда материалдар чогултулуп, укуктук баа берүү максатында прокуратура органдарына өткөрүлүп жатканы маалым болду.