7 облустун башчыларына кооптуу кырдаалдарга даярдануу тапшырмасы берилди

Премьер-министр Сооронбай Жээнбеков 25-мартта 7 облустун башчылары менен кеңешме өткөрдү. Талкууланган тема - чукул кырдаалдардын алдын алуу, жазгы тазалоо жана жашылдандыруу иштери. Өкмөт жетекчиси салтка айланып калган ишембиликтерди жандандырууну буюрду.

"Ишембиликтер көчөт отургузуу менен коштолот. Бирок алар талаптагыдай каралбай калат. Эгерде мурда тигилген көчөттөргө тийиштүү кам көрүлгөндө, анда мекенибиз джунгли сыяктуу эбак эң жашыл мамлекетке айланмак. Тигилген көчөттөргө кам көрүү, өз убагында сугарууга өзгөчө көңүл буруу зарыл", - деди Жээнбеков.

Премьер-министр апрель айында өлкөнүн түштүк аймагында жаан-чачын нормадан көп жаашы күтүлүп жатканын, мындан улам чукул кырдаалдарга даяр туруу керектигин айтат. Облус башчыларына кооптуу кырдаалдардын алдын алуу иштерин күчөтүү, Өзгөчө кырдаалдар министрлигине күнү-түнү нөөмөт уюштуруу тапшырмасы берилди.