Садыр Жапаров кармалгандан кийин 48 сааттын ичинде ага баш коргоо чарасы аныкталат

Жогорку Кеңештин экс-депутаты Садыр Жапаров кармалгандан кийин 48 сааттын ичинде ага баш коргоо чарасы аныкталат. Бул тууралуу бүгүн, 26-мартта УКМКнын басма сөз кызматы билдирди.

Маалыматка ылайык, учурда тергөө иштери уланууда.

Эскерте кетсек, Садыр Жапаров кечээ Казакстандан Кыргыз мамлекетине кирген. Аны чек арадан күч органдары кармап кетишкен. "Бейбаштык", "бийлик өкүлүнө карата зордук-зомбулук көрсөтүү", "барымтага алуу" жана башка беренелер боюнча айыпталып жаткан Жапаров УКМКнын СИЗОсуна 48 саатка отургузулган. УКМК 2013-жылдын 7-октябрында Каракол шаарында өткөн митингди Жапаров каржылаганын, митингдин катышуучулары ошол кездеги облус жетекчиси Эмилбек Каптагаевди күч менен унаага салып, туткунга алып отурушканын билдирген. Мекеме 7-октябрдагы митингдин максаты Ысык-Көл облустук администрациясын басып алуу, облуста тополоң чыгаруу болгон деп маалымат тараткан.