5 суткага камалып чыккан активисттер: "Бизди эң жаман шартта, чыныгы түрмөдө кармашты"

18-мартта сөз эркиндигине арналган жөө жүрүштө кармалып, 5 суткага камалып чыккан жарандык активисттер бүгүн, 27-мартта маалымат жыйынын өткөрүштү.

Анын жүрүшүндө коомдук ишмер Расул Умбеталиев: "Бизди ар бирибизди башка-башка бөлмөгө алып кирип протокол толтурушту. Свердлов райондук соту 5 күнгө камалышыбызды билдирген протокол менен тааныштырган жок. Бизге түштөнүүдө макарон менен суу беришти. Бизди эң жаман шартта, чыныгы түрмөдө кармашты. Биз 3-революцияга каршыбыз. Мен буга чейин кандуу революцияларга катышып көргөм", - деп билдирди.

"Жаңы муун" кыймылынын мүчөсү Мавлян Аскарбеков өлкө саясий кризиске кептелип тышкы саясат талкаланганын айтты. "Жакынкы өлкөлөр менен мамилебиз начарлады. Ал эми эл кыйналып куугунтук болуп атса лидермин дегендер селфи сүрөткө түшүп үн катпай отурушат. Өлкөдө 500дөй адам чет өлкөдөн өлүп келүүдө. Ошондой эле бир канча чечилбеген көйгөйлөр келип чыкты. Тез арада парламент сөз эркиндигин жана өлкөдө болуп жаткан маселелерди талкууга алышы керек. Өлкөбүз эртең жок болуп кетүү коркунучу алдында турат", - деген ойдо Аскарбеков.

"Бир убакта 1937-жылы саясий куугунтук көрсөтүп саясий лидерлерди тукум курут кылышкан. Биздин камалышыбызды да саясий куугунтук кылышты. Куугунтуктар жүрүп отурса жакшылык болбойт. Атамбаевден куугунтукту токтотууну талап кылабыз. Президент элдин пикирин укпай туруп конституцияны өзгөртүп койду. Атамбаев турганда таза шайлоо болбойт. Жеке оюн айткандарды да миллиондорго жыгып жатат. Баарыбыз биригип адилеттик үчүн күрөшүшүбүз керек", - деген пикирин билдирди активист Айбек Мырза.

Мындан сырткары жыйындын жүрүшүндө активисттер жаштарды, студенттерди өз ойлорун айтып чыгууга чакырышты.

Эске салсак, 18-мартта өткөрүлгөн жөө жүрүштө Мухит Мамытов, Мавлян Аскарбеков, Айбек Мырза, Расул Умбеталиев жана Азамат Аттокуров 5 күнгө Бишкек ШИИББинин кабыл алып бөлүштүрүү жайына камалган.