Бейөкмөт уюмдар Боинг кырсыгынан жабыркагандарга жардам көрсөтүү үчүн чогулган каражатты бөлүштүрүп беришти

Кырсыкка кабылган "Боинг-747" учагынан жабыркаган жарандарга жардам катары чогулган каражат бөлүштүрүлдү. Бейөкмөт уюмдарда жардамды чогултуу 2017-жылдын 1-мартында аяктаган. Каражаттарды бөлүп берүү иш-чарасына "Кызыл жарым ай" коомунун президенти Азамат Баялинов жана "Жардам берүү оңой" коомдук фондунун директору Динара Аляева катышты. Бул тууралуу 27-мартта SUPER.KG порталына "Кызыл жарым ай" коомунун өкүлү Бегимай Асанова билдирди.

"Коомдук уюмдар тарабынан кырсыктан жабыркагандарга жардам көрсөтүү үчүн ачылган эсеп 1-мартта жабылды, жалпы 5 127 013 сом келип түштү. Кырсыктан ата-энесинен ажырап, жалгыз калган балдарга 798 000 сомдон, жарым жетимдерге 300 000 сомдон, үй жайсыз калгандарга 60 000 сомдон, жакын адамдарын жоготкондорго 70 000 сомдон берилди. 150 000 сом жабыркагандардын дарыланышы үчүн деп "Жардам берүү оңой" коомдук фондунда калтырылды" деп айтылат маалыматта.

Ал эми ӨКМнын атайын эсебине жалпы 96 миллион 532 миң 026 сом 61 тыйын чогулганын өкмөттүн басма сөз кызматы 16-мартта билдирген. Өкмөттө өткөн жыйында чогулган каражатты бөлүштүрүү боюнча сунуштарды иштеп чыгуу тапшырмасы берилген.