Лондондогу террордук актыны жасаган адамдын аялы каза болгондордун жакындарына көңүл айтты

Лондондогу террордук актыны жасады деп айтылган Халид Масуддун аялы Рохей Хайдара күйөөсүнүн жасаганын сынга алып, каза болгондордун жакындарына көңүл айтты. Бул тууралуу 28-мартта The Telegraph басылмасы жазып чыкты.

Күйөөсүнүн террордук чабуулга барганына шок болгонун айткан Рохей Хайдара "анын жасаганын кескин түрдө айыптайм. Каза болгондордун үй-бүлөсүнө көңүл айтып, жаракат алгандардын тезирээк айыгып кетишин каалайм" деген. Мындан сырткары үй-бүлөлөрүндө кыйын кез болуп жатканын эске салып, жеке жашоого кол тийбестик укугун сактоого чакырган.

Айта кетсек, 22-мартта белгисиз адам Лондондогу парламент имаратынын жанында унаасы менен жөө кишилерди сүздүрүп, кийин парламентти кайтарган полициячыны бычактаган. Лондон полициясы чабуулду уюштурган адам 52 жаштагы Халид Масуд деп билдирген. Жалпы 5 адам каза болуп, 40ка жакын адам жаракат алган. Каза болгондордун баары Улуу Британиянын жарандары, жабыркагандардын арасында чет өлкөлүктөр бар экени айтылган. Окуя үчүн жоопкерчиликти "Ислам мамлекети" экстремисттик тобу өзүнө алган.