УКМК: "Ата Мекендин" айрым мүчөлөрүнүн мародёрчулукка катыштыгы бар экенине далилдер табылды"

"Жогорку Кеңештин "Ата Мекен" фракциясынан айрым депутаттарынын жана кармалган Райкан Төлөгөновдун туугандарынын билдирүүлөрү - жоопкерчиликтен качуу үчүн мародёрчулук боюнча кылмыш ишиндеги факттарды саясатташтырууга аракеттенүү", - деп УКМКнын басма сөз кызматы жоопту таратты.

Маалым болгондой, 2010-жылдагы мародёрчулук боюнча кылмыш ишинин алкагында тергөө иштери жүрүүдө. "Жүргүзүлгөн иш-чаралардын натыйжасында аталган партиянын айрым мүчөлөрүнүн мародёрчулукка катыштыгы бар экенине далилдер табылды", - деп айтылат УКМКнын билдирүүсүндө.

УКМК 28-мартта Райкан Төлөгөновго "тоноону уюштуруу", "мүлктү атайылап жок кылуу же зыянга учуратууну уюштуруу", "ок атуучу куралдарды, ок-дарыларды, жарылуучу заттарды жана жардыргыч түзүлүштөрдү мыйзамсыз алуу, берүү, өткөрүү, сактоо, ташуу же алып жүрүү" беренелери боюнча кылмыш иши козголгонун билдирген. Биринчи Май райондук сотунун чечими менен Төлөгөнов тергөө бүткүчө УКМКнын тергөө абагына камакка алынган.

Бүгүн, 29-мартта мародёрчулукка шектелип кармалган Райкан Төлөгөновдун иши боюнча маалымат жыйыны өткөн. Анда Төлөгөновдун уулу Иса "УКМКнын кызматкерлери атамды шантаж кылышты" деп айткан.