Улуу Британияда 90 жаштагы согуш ардагери жынысын алмаштырды

Улуу Британияда 90 жаштагы Экинчи дүйнөлүк согуштун ардагери жынысын алмаштырды. Бул тууралуу бүгүн, 31-мартта чет элдик басылмалар жазып чыгышты.

Маалыматка караганда мындан бир нече жыл мурун Лестершир графтыгынын тургуну Питер Дэвис ысымын Патриция деп өзгөртүп, документтерин алмаштырып, гормон терапиясынан өтүүнү чечкен.

"Башында бул чечимим тууралуу кошуналарыма айтсам, алар туура кабыл алышты. "Бул нерсе сени бактылуу кылып жаткандан кийин кабатыр болуунун кереги жок" дешти", - дейт ал.

Согуштун ардагери бала чагынан бери башка эркек балдарга окшош эмес экенин сезип жүргөн, бирок бул тууралуу башкаларга айтуудан корккон. 2015-жылы Дэвис башкы ролдо актриса-трансгендер Ребекка Рут ойногон британиялык "Boy Meets Girl" комедиясын көргөн. Аталган тасма анын жынысын алмаштыруусуна түрткү болгон.

"Ийинимден оор жүктү алып салгандай эле сезип жатам өзүмдү. Ушул убакка чейин жалган менен жашап келиптирмин", - дейт сүйүнгөн Патриция.

1945-жылы 18 жашында ал аскерге чакырылган. Көп өтпөй Ыраакы Чыгышка жөнөтүлүп, Япония менен болгон согушка катышкан, андан соң Индияга жөнөтүлгөн. Мекенине кайтып келгенден кийин сүрөтчү болуп иштеп, үйлөнүп, жубайы менен 63 жыл бирге жашаган. Үй-бүлө кургандан кийин 60 жылдан соң жубайына жогорудагы маселеси тууралуу айткан. Ал эми аялы аны түшүнүү менен кабыл алган. Түгөйлөрдүн бирге өмүр сүрүшкөнүнө 63 жыл болгондо жубайы көз жумган.