Энергетика: "Акылдуу эсептегичтер" эми Кыргыз жеринде жасалып баштайт"

Өкмөттө 31-мартта энергетикалык ресурстарды көзөмөлдөө жана каттоонун автоматташтырылган системинин жабдууларын Кыргыз Республикасында өндүрүү маселеси талкууланды.

Премьер-министр Сооронбай Жээнбеков энергетикада "акылдуу эсептегичтер" электрди уурдоону жана жоготууларды азайтуучу систем экенин айтты. Улуттук энергетикалык холдинг компаниясы ишканасынын директору Айбек Калиев да ушундай пикирде. "Акылдуу эсептегичтер" коммерциялык жоготууларды азайтып, карыздарды жыйноого жакшы шарт түзөрүн белгилейт. 2012-жылдан 2016-жылга чейин "акылдуу эсептегичтердин" жардамы менен жоготууларды 22,9 пайыздан 11,6 пайызга чейин азайтылганы айтылды.

"Акылдуу эсептегичтерди" Кыргыз жеринде өндүрүү иши Кыргыз-Орусия өнүктүрүү фонду менен биргеликте жасалмакчы. Фонддун жетекчиси Кубанычбек Кулматов долбоор кантип каржыланары жөнүндө премьерге маалымат берди. Долбоорду 3 жылда ишке ашыруу жагы каралууда. Калиевдин айтымында, баштапкы этапта 200 миң эсептегич сатып алынат. 200 миң эсептегич орнотулгандан кийин энергетикадагы жоготуу жылына 200 миллион киловатт-саатка чейин азаят, муну менен 220 миллион сом кошумча киреше түшөт деген ишеничте ишкана жетекчиси.

Премьер-министр аталган долбоорду ишке ашырууну тездетүү тапшырмасын берди.