Майлы-Суу шаарынын мэриясына караштуу "Суу канал" ишканасынан 2 миллион сом уурдалды

Жалал-Абад облусунун Майлы-Суу шаарынын мэриясына караштуу "Суу канал" ишканасынын жооптуу кызматкерлери мамлекетке 2 миллион 222 миң 661 сом өлчөмүндө зыян келтирген. Бул тууралуу бүгүн, 6-майда Башкы прокуратуранын басма сөз кызматы билдирет. Айтылгандай, жооптуу кызматкерлер 2011-жылдын январь айынан 2013-жылдын апрель айына чейин "Суу каналдын" балансында турган материалдык баалуулуктарды саткандан түшкөн 1 миллион 628 миң 700 сомду өзүлөрүнө алышкан. Мындан сырткары 2011-жылдын июль айынан 2012-жылдын декабрь айына чейин “канал оңдолду жана суу түтүктөрүн алмаштыруу иштери жасалды” деген жалган документтерди жасашып, 593961 сомду өздөрүнө чегерип алышкан. Жогорудагы фактылар боюнча облустун прокуратурасы тарабынан аталган ишканасынын жооптуу кызматкерлерине Кылмыш кодексинин 304-беренеси (кызматтык абалынан кыянаттык менен пайдалануу), 171-беренеси (ишенип берилген мүлктү ыйгарып алуу же төлөмөр болуу) жана 315-беренеси (кызматтык жасалмачылык) боюнча кылмыш иши козголду.