Каржы министрлигине 2017-жылдын үч айында жарандар насыяны жабуу, ипотека, социалдык төлөмдөр боюнча кайрылышкан

2017-жылдын I кварталында Каржы министрлигине 187 кайрылуу түшкөн. Бул тууралуу аталган мекеменин расмий сайтына 4-апрелде жарыяланды.

Маалыматка караганда жарандар насыяларды жабуу, насыяга үрөн берүү, ипотекалык насыя боюнча ссудаларды бөлүү жөнүндө кайрылышкан. Мындан сырткары социалдык мүнөздөгү маселелерде мектептерди, бала бакчаларды, спорт залдарды курууга, жер титирөөлөрдүн натыйжасында бузулган үйлөрдү калыбына келтирүүгө каражаттарды издеп табуу, мугалимдердин эмгек акыларын төлөө, аскер кызматчыларына пенсияларды, баатыр энелердин пенсияларына кошумча төлөмдөрдү чегерүүлөрдү кароо боюнча кайрылуулар түшкөн.

Аймактарга бөлүп караганда Бишкек шаарынан - 60, Ош облусу - 34, Баткен - 11, Жалал-Абад - 30, Чүй - 14, Ысык-Көл - 7, Талас - 8 жана Нарын облусунан 23 кайрылуу болгон.